PROZESUAREN AZALPENA

Abadiñoko Udalak prozesu partehartzaile berri bat jarri du abian. Oraingoan, Probalekuko espazioan estalitako aisialdirako egokitzapenak egiteko herritarren iritzi, proposamen eta ekarpenak jaso nahi dira. Jakina denez, egun Probalekua hainbat eragilek erabiltzen dute ekintza ezberdinetarako —dantza, sokatira, herri bazkariak, etab—baina asteburuetan ez da ekintza askorik egiten bertan eta Udalak biziberritzeko erronka mahaigaineratu du, herritarren laguntzaz, ekintza berriak ekarri eta beharrezko interbentzioak egin daitezen bertan.

Hori dela eta, 4 pausutan oinarritzen den prozesua jarriko du abian:

Prozesuaren faseak

1. Aurkezpena eta deialdia

Prozesuaren aurkezpen publiko bat egingo da Abadiñoko Udala, tokiko elkarteak eta herritarren presentziarekin. Saio honetan prozesuaren nondik norakoak azalduko dira eta helburuen eta pausuen informazio guztia eskaini. Honekin batera, parte-hartzea sustatzeko difusio kanpaina bat jarriko da abian sare sozialetan eta tokiko hedabideetan.

2. Proposamenen diseinua

Fase honetan, aurrez aurreko jardunaldia burutuko da lehenengo Probalekua erabiltzen duten kolektibo ezberdinekin: kirol, kultura, hezkuntza, auzo-elkarteak. Jarraian, Probalekuan proposamenak lantzeko eta zehazteko tailer edo lan-saio irekia egingo da eta epe labur, ertain eta luzerako potentziala duten jarduerak identifikatuko ditugu elkarrekin.

3. Proposamenen errebisio teknikoa

Udaleko teknikariei proposamen guztiak elaraziok zaizkie pausu honetan, eta hauek, proposamenen errebisioa egingo dute hilabete batean zehar, egingarriak diren ala ez ebaluatzeko. Egingarriak ez diren proposamenen egileei azalpen mezua helaraziko zaie, baztertzearen berri emateko.

4. Proposamenen aurkezpena eta lehenespen partehartzailea

Egingarriak diren proposamenak ordea, azken fase honetarako iritsiko dira. Hauek aurkezpena ireki bat egingo da banan-banan azaltzeko eta ondoren, proposamenen lehenespen bat egingo da 2025. urtean aurrera eramango diren proposamenak zein izango diren zehazteko. Saio honetan bertan, behin lehenespena eginda, Probalekua hobetzeko jarduera-ildoak onartuko ditu Udalak, egin beharreko interbentzioak martxan jarri daitezen.

PROZESUAREN HELBURUAK

• Abadiñoko Probalekuan garatu daitezkeen jarduerak identifikatzea, bere erabilera eta komunitatearentzako onura areagotzeko.
• Instalazioak eta irisgarritasuna hobetzeko beharrezko esku-hartzeak zehaztea.
• Herritarrak, bereziki tokiko kolektibo eta eragileak, espazioaren etorkizunari buruzko erabakietan inplikatzea.
• Probalekuaren egokitzapena erabiltzaileen behar eta itxaropenei erantzuteko diseinatzea.
• Herritarren parte-hartzea eta espazio publiko honen inguruko jabetza-sentimendua sustatzea.